|
06.07.2022
Чийүә чȳ 6 Хазахстан гуйтуни гуә дин дади җечи - Астана җинчынди жызы. Вуҗин ба та җёди Нур-Султан.
Җыгә җечи, ги заму, ба Хазахстан ю го лисыди зэмусы каншу куйчын дэ лийиди, ба тамуди нынгȳ дэ фаҗон, каншу тэпин дэ щёнходи лян йиче мизȳди тунйи сычин ман нын канчȳлэ.
1994 няншон чийүә чȳ 6 ба җинчын Алма-Аты хуанчын Акмолали. Йичыр до 1998 няншон Акмола чынха Хазахстанди щин җинчынли.
Кәсы вуйүә чȳ 6 1998 няншон ба Акмола хуанчын Астанали. Зу да нэхур йиче Хазахстан гуйтуди минзȳ жынму ба та зȳ гощинди җейинли.
Астана – җысы Хазахстанди җинчын. Астанасы – да чын. Та тэ хокан, чинщю, җүнмый. Хонзы куан, лўфонзы го, хуар кэди җүн.
Астана ю Байтерек, ю чонди пынчуан лян пирамида луфонни. Астана ю хошоди щүәтон, да щүә, бинйүан, щийүан, фынчуан чонзы дэ хуәчәзанни.
Вуҗин Хазахстанди җинчынди минзы Нур-Султан. 2019 няншон санйүәни замуди Зунтун Касым-Жомарт Токаев гиди фынфу Астана чынха Нур-Султанли, йинви Хазахстан ту йигә Зунтунсы Н.А.Назарбаев
Зу зэ замуди җүнмый дэ шызэ хоканди җинчыни Нур-Султан гуә дин җун-ё йисыди җечидини. Няннян йинви җейин җыгә җечи, замуди Зунтун лян ги та бонмонди жынму щюгэди заёнди җищён, щюгэди щин щүәтон лян суй вавади йүанзыму, гәшы-гȳёнди пузы дэ җȳди фонзы.
Хазахстан җинчынни Нур-Султанни зу җы йитян да йизор йичыр до бан-ени жынму кан заёнди чигуэ йинйинхуэй дэ данлинди шәлүхади жәно дэ чигуэди ганбан.
|
