|
09.05.2023
Вида Зўгуй жон йинян ган йинян ли заму йүанли. Совет минжын зэ нэгә дэдў жоншон дыйли шын жиннян кәжя 78 нянли. Няннян вуйүә чў жю ба Дыйшын жечи чүан шыжешонди йиче жынму гуәдини. До Хазахстан дэ Хырхызстанди мый йигә жыншон вуйүә чў жю есы гуйжун жыэы.
Заму ду жыдони, бонжер сы нян литу гуон совет минжын зэ Вида Зўгуй жоншон дюшәли эршы жигә миллион жын. Зу нэгә винанди сыхуршон вида гуйжя литу жўди йиче минзўди дэбёму зэ йүхади дэдў жоншон щянли эыжиди бынсыли. Таму литу хуэйзўжын е бушо. Хазахстан дэ Хырхызстанди сычян дўә лохуэйхуэй е цанжяли жыгә жонли. Таму мә щитын гәжяди гончён лян мин лян фашистди жёчёнжяму жынжанли.
Лохуэйхуэйди жүнзыму зэ йиманди жонкушон е йинйүнди бохўли зыжиди Зўгуйли. Зэ жыгә сынза жоншон хуэйзўминжынди хоханзы эрзы Мансўзы Вонахун чынха Совет Лянбонди Йинщүнли. Дыйли орден лян медальди жын е бушо.
Гуон да Кордай районди Каракунуз (щянзэди Масанчын) щёнжуонни 300 дуә лохуэйхуэй шонли жонли, жыгә фур литу бонжер 200 жын мәдый жуанхуэйжя. Таму ви бохў Зўгуй ба зыжиди мин тепыйшон, йүнжю шындо жонкушонли. Ви щянха данзы дади бынсы дуәдуәрди жүнзыму дыйли гуәжяди орден лян медальли — жысы Каракунуз щёнжуонниди Джаншанло Суваз, Имаров Вур, Чонтей Гуйлин, Санва Суваз, Двумаров Гадиз, Уджур Сулей, Гуаров Харсан, Хуров Исхар, Сибо Данва, Сибо Хур, Сваров Арбуду, Исыр Манар, Беква Сулей, Беква Бар, Лилизов Сулей, Вайсыров Харки, Улюров Юсуф, Меваз Мар, Шаров Дау, Ясыров Юбур, Хусар Щива, Гейсыр Лю зэ данлинди, Шортюбе (вужинди Сортобе) щёнжуонниди – Хия Яр, Айдыров Хия, Чубаза Исмаил, Дауров Щимар, Щилязов Салихар, Буларов Харки, Вайсыров Харки Санху Вушир, Лолю Манар, Щимей Мар, Искаков Гейсыр, Дыширов Харсан, Манезов Исхар, Лилизов Сулей, Лемезов Исмар, Ванчанщи Бисыр, зэ данлинди.
Ду жыдони, Дыйшын жызы – жысы нянлуй ян щинди жечи. До жиргәди жызы хан зожуә жоншон шәхади, зочян мәю сыса йинщёнди жүнжынмудини, билүн: Жямбыл областьшонди Общественное объединение «Парыз» зэ Белоруссия зожуәли 562 шәдёди жямбылжяму, жыгә фур литу 28 солдатсы Кордай районшонди. Жы 28 кордайжяму литу 7 жүнжынсы лохуэйхуэй: жысы да Масанчын щёнжуонни зули жоншонди Шерба Бакир, Дива Хор, Тумаров Исхар, Дыва Хахар, Суров Арли зэмусы да Сортобе щёнжуонни доли жонкушонди Суров Юнур дэ Матжигуев Шали.
Вуйүә чў жюсы Хазахстан дэ Хырхызстан минжынди да жечи.
Ю лёнщинди хубый ба зыжиди йинщүнму йүн бу нын вон.
М. Джинлиров
|
