|
23.05.2023
Шыҗешон мый йигә жынди дин дади вонщёнсы - чуанлян зыҗиди җящя. Җыгә җящяни фанчон дын дэ щинэ нидини. Дуәйибанзы жынму ба җыгә йүнчи зэ җящяни зоҗуәдини. Зу йинви җыгә тэпин, щинэ, цощин чынха җящяди дин ёҗиндини ганбанли.
Җящя – җы зусы йиче ганбанди тур. Зу зэ җящянни ваму ба нёнлозыму шәхади щинҗи хуа, ганбан, тёён йибыйзы вонбулё. Таму щинэди җящя ю зыҗиди куйчынни – җысы зэ җуәзы гынчян хә ца зэмусы чинжәди ламә, гунщи сынжыр, дадю вонжынму, йиданни щехуан зэмусы та тўён, йидани гощин дэ пәфан, йигә ги йигә ги бонцу, йигә фубон йигә. Нёнлозыму фиди да гункў тёён дэ лянлуә зыҗиди вамули. Мыйи йигә жын зу тади нёнлозымуди җуәзун зу гуәли гуонйинли. Винанди сыхур таму зу доли нёнлозыму гынчянли, ё тамуди хо җўйи, ё хо бонцу хуа.
Җящя – җысы мыйи йигә жынди дин гуйҗунди бобый. Зу зэ җящяни заму щищүә щинэ нёнлозыму, тэнэ зэмусы цощин дин линҗинди жынму, фужо вичүму. Винанди сыхур йигә ги йигә шә җи җү хо хуа, бонмон, фубон. Щинэ ниди чин жынму лян ни йидани гощинни зэмусы пәфанни. Ба таму ги ни чынхади жә шущин фанчон ни нын җуәлэ! Ниму зу җыхали: шыҗешон ни бусы йигәр.
Ги дуә йибанзы жынму җящя - җысы щинэди линҗинди жынму фанчон зэ гынчянни, таму зу йигә җингуан зэмусы цощин йигәрни.
Җящя лян мама датурдини. Мама – шыҗешон до мый йигә жын гынчян җысы дин гуйҗунди жын! Ба мамади щинэ до зыҗиди ваму гынчян шә йибыйзы ду шә бу ван. Ба тади щёляр, жә шущин тянтяр вумый зывонди җё зэ гынчянди. Йинви җыгә мамасы каншу җящяди зохуә!
Мәю җящя – мәю сынхуә. Җящя – җысы җынҗў, кошу, җыҗя! Җящя - җысы чынчён!
Хазахстан - ю тэпинди, ю щёнходи, ю фуҗүди, ю зыюди, ю минзў дуәди зэмусы ги каншу Җящяди гуйту.
Хазахстан гуйтуни мощёр санбый дуә чян нүжынму ба Минйү шонхо «Алтын алқа» - (җысы сын - ёнли дэ тёёнли чигә зэ дуәщёрди ваму), «Күміс алқа» - (җысы сын-ёнли дэ тёёнли люгә вамуди мучинму) дыйшонли.
Зу да 2023 няншон тушон сыбый җюшы ба чян мучинму (более 498,5 тысяч многодетных семей) дуәфурди җящяму линди гуйҗяди чян бонцу (госпособие).
Гуйту ги мучинму тёён ваму гиди да бонцу, таму зу җымуҗя лин чяндини: җящяни зэ ю 4 вава таму линди -55 304 тенге; җящяни зэ ю 5 ваваму линди - 69 138 тенге; ю 6 вамуди җящяни линди - 82 973 тенге; 7- дуәщёрди ваму лин – 96 807 тенге, ю 8 вамуди җящяни линди - 110 400 тенге.
Зу да җыгәшон нын канлэ замуди Зунтун лян Гуйту ги каншу дэ фубон Җящяму лю дашындини - җы зусы сынхуәшонди дин ёҗинди сычин.
Шыҗешон щинэди йинсын тэ дуәдихын. Да ба җунщүә җынни йи нянван ду зу җочў щинэди йинсын вонщёнди вончян зы шыканди зуни. Ги фаҗон гуйҗун Зўгуйди сычиншон ба зыҗиди йиче лилён сыйүншон фи гункўни.
Мый йигә жын щинэ зыҗи ю йүнчиди җящяни, щинэ нёнлозымуни, щинэ гункў дэ вонщённи, щинэ тэпин лян пиннанни. Даҗунди дин дади зывон зусы җё шәгуәди җыщезы сычин ду чынзуәлё!
Җящя – җысы Йүнчи, Щинэ дэ чынгун! Ӊәди җящя – җысы чынкэди бонзы, Ӊәди җящя – җысы ганҗин чисый, Ӊәди җящя – җысы ӊәди да вонщён. Ӊәди җящя –җысы щин сынхуә! Ӊәди җящя –җысы хуанлуә щёшын! Йинви җыгә ба та бу нын дюдё! Зу ба гуйҗунди җящя жынму на минйү, бобый дэ миншын ду бу хуан. Йинви җыгә фонгў, щёщин зэмусы кангў зыҗиди Җящя!
|
